20ஓவர்  உலக கோப்பை போட்டிகள் ஐக்கிய அரபு அமீரகத்தில் சிறப்பாக நடைபெற்று வந்த நிலையில் நேற்று முன்தினம் இறுதி போட்டி நிறைவடைந்தது .இதில் நடந்த இறுதிப் போட்டியில் நியூசிலாந்து மற்றும் ஆஸ்திரேலியா அணிகள் மோதின. இப்போட்டியில் ஆஸ்திரேலிய அணி 8 விக்கெட் வித்தியாசத்தில் அபார வெற்றி பெற்றது. ஆஸ்திரேலிய அணி முதல் முறையாக டி 20 சாம்பியன் பட்டத்தை கைப்பற்றியது இதுவேயாகும்.

          இந்நிலையில் இந்தியாவில் சுற்றுப்பயணம் மேற்கொள்ள உள்ள நியூசிலாந்து அணி மூன்று டி20 போட்டிகள் மற்றும் 2 டெஸ்ட் போட்டிகளில் விளையாட உள்ளது. இத்தொடரில் பங்கேற்பதற்காக நியூசிலாந்து அணியினர் நேற்று ஜெய்ப்பூர் வருகை தந்ததுள்ளனர்.

         நடந்து முடிந்த டி20 உலக கோப்பை தொடரில் அரையிறுதிக்குள் நுழைய முடியாமல்  வெளியேறிய இந்திய அணியும்,  உலக கோப்பையில் 2-வது இடம் பிடித்த நியூசிலாந்து அணியும் மோதுகின்றன. மேலும் தற்போது இந்திய அணியின் தலைமை பயிற்சியாளராக ராகுல் டிராவிட் பொறுப்பேற்ற பிறகு இந்திய அணி பங்கேற்கும் முதல் போட்டியாகும்.

          இந்நிலையில் இந்திய அணிக்கு எதிரான டி20 போட்டிகளில் இருந்து நியூசிலாந்து அணியின் கேப்டன் கேன் வில்லியம்சன் விலகுவதாக தெறிவித்துள்ளார்.  கான்பூரில் நவம்பர் 25-ம் தேதி தொடங்கும் டெஸ்ட் தொடருக்கு தயாராகுவதற்காக, இந்தியாவுக்கு எதிரான மூன்று ஆட்டங்கள் கொண்ட டி20 தொடரில் இருந்து  மட்டுமே விலகுவதாக கேன் வில்லியம்சன் தெரிவித்துள்ளார்.

          இதனால் நாளை தொடங்கும் டி20 தொடரின் தொடக்க ஆட்டத்தில் டிம் சவுதி கேப்டனாக செயல்படுவார் என்று நியூசிலாந்து அணியின் தரப்பிலிருந்து அறிவிக்கப்பட்டுள்ளது.

நியூசிலாந்து அணியின் உத்தேச வீரர்கள்: 

  • மார்ட்டின் குப்டில்
  • கைல் ஜேமிசன்
  • ஆடம் மில்னே
  • டேரில் மிட்செல்
  • ஜிம்மி நீஷம்
  • க்ளென் பிலிப்ஸ்
  • மிட்செல் சான்ட்னர்
  • டிம் சீஃபர்ட் (கீ)
  • இஷ் சோதி
  • டிம் சவுதி (கே) 
  • டாட் ஆஸ்டில்
  • டிரெண்ட் போல்ட்
  • மார்க் சாப்மேன்
  • லாக்கி பெர்குசன்